Жүктелуде…
Суреттерді жаңа сөздерді таныстыруда, бекітуде және сөйлесім тапсырмаларында пайдаланыңыз. Оқушылар дене мүшелері мен киім атауларын атайды, сәйкестендіреді, сипаттайды, сұрақтарға жауап береді және өзара диалог құрады. Осындай көрнекі тапсырмалар сөздік қорды белсенді қолданып, ауызша сөйлеуді дамытып, жаңа лексиканы ұзақ уақыт есте сақтауға мүмкіндік береді.
Оқушыларды төрт топқа бөліңіз. Әр топтағы оқушыларға 1-ден 4-ке дейін нөмір беріңіз. Нөмірі бірдей оқушыларды бір топқа жинаңыз. Әр топқа мәтіннің бір абзацын беріңіз. Оқушылар мәтінді оқып, карточканы толтырады, кейін топта талқылайды. Содан соң олар өз топтарына қайтып келеді. Әр оқушы өз абзацы туралы карточка бойынша ақпарат береді. Осылайша әр топ мәтіннің төрт абзацымен де танысады. Соңында оқушыларға сұрақтар қойып немесе тест тапсырмаларын беріп, кері байланыс жасауға болады.
Коммуникативті ойындарды сабақтың бекіту, қайталау немесе жаңа сөздерді белсенді қолдану кезеңінде пайдаланыңыз. Алдымен ойынның мақсатын түсіндіріп, қысқа үлгі көрсетіңіз, кейін оқушыларға өзара еркін тілдік қарым-қатынас жасауға мүмкіндік беріңіз. Ойын барысында қатені бірден түзетуге емес, сөйлесуге ынталандыруға назар аударыңыз. Осылайша оқушылардың сөйлеу белсенділігін арттырып, сөздік қорын дамытып, қазақ тілінде сенімді әрі табиғи қарым-қатынас жасау дағдысын қалыптастырасыз.
«Дене мүшелерін салу», «Лексиканы қайталау», «Сурет салу», «Тақырып бойынша сөздерді топтастыру», «Сұхбатқа қатысу», «Сипатта. Анықта. Бұл не?» ойындары оқушыларды сөзді жаттауға емес, оны сөйлесімде қолдануға жетелейді. Осы ойындар арқылы лексиканы, ауыспалы осы шақты, модальді құрылымдарды және диалог құру дағдыларын қызықты әрі белсенді форматта бекітесіз.
«Менің ойымша» ойыны оқушылардың сұрақ қою, жауап беру және серіктесі туралы ақпаратты нақтылауы дағдыларын дамытады. Оқушы алдымен серіктесі жайлы болжам жасайды, кейін сұрақ арқылы жауабын тексереді. Соңында алынған ақпаратты пайдаланып, серіктесі туралы әңгімелейді. Ойын ауыспалы осы шақты, жіктік және тәуелдік жалғауларын коммуникативтік жағдаятта қолдануға мүмкіндік береді, әрі тілдік қарым-қатынасты нығайтады.